உலகின் வல்லரசுகளுக்கு இடையிலான போட்டியில் இலங்கை எந்தவொரு அணியுடனும் ஒத்திசைந்து செயற்படவில்லை : ஜனாதிபதி !

உலகின் வல்லரசுகளுக்கு இடையிலான போட்டியில் இலங்கை எந்தவொரு அணியுடனும் ஒத்திசைந்து செயற்பட வில்லை. மாறாக சுயாதீனமான அணிசேரா நிலைப்பாட்டிலிருந்தே செயற்படுவதாக தெரிவித்த ஜனாதிபதி ரணில் விக்கிரமசிங்க, நாட்டைப் போன்றே அரசியலமைப்பையும் பாதுகாக்க வேண்டிய கடப்பாடு இராணுவத்திற்கு உள்ளது. அதனை இன்று ஒப்படைப்பதாகவும் குறிப்பிட்டார்.

தியத்தலாவை இராணுவ பயிற்சி முகாமில் பயிற்சிகளை நிறைவு செய்த இராணுவ சிப்பாய்களுக்கு பதக்கமளிக்கும் நிகழ்வு நேற்று சனிக்கிழமை இடம்பெற்றது. இந்நிகழ்வில் கலந்து கொண்டு உரையாற்றும் போது இதனைத் தெரிவித்த ஜனாதிபதி ரணில் விக்கிரமசிங்க மேலும் குறிப்பிடுகையில்,

இராணுவத்தில் தலைவர்கள் என்ற ரீதியில் ஏனைய இராணுவ வீரர்களையும் அதே போன்று நாட்டையும் பாதுகாக்கும் பொறுப்பு உங்களுக்கு காணப்படுகிறது. நாட்டுக்காக நாட்டின் தலைவராக நான் உங்களுக்கு அந்த பொறுப்கை வழங்கியுள்ளேன். எனவே நாட்டை பாதுகாப்பது உங்களது பொறுப்பாகும்.

நாட்டைப் போன்றே நாட்டின் அரசியலமைப்பையும் பாதுகாக்க வேண்டும். அதன் மூலமே நாட்டை பாதுகாக்க முடியும். நாட்டை அந்நியர்களிடமிருந்தும் பாதுகாக்க வேண்டும். இவ்விரு காரணிகளுமே உங்களிடம் ஒப்படைக்கப்பட்டுள்ளன. அதனை நீங்கள் நிறைவேற்ற வேண்டும். நிறைவேற்றுவீர்கள் என்று எதிர்பார்க்கின்றோம்.

அனைத்து சந்தர்ப்பங்களிலும் உங்களுக்கு பயிற்றுவித்த நிறுவனத்தின் கௌரவத்தை பாதுகாக்க வேண்டும். அந்த நற்பெயரை மேலும் மேம்படுத்துங்கள். அதே போன்று நீங்கள் இணையும் இராணுவத்தின் கௌரவத்தையும் நற்பெயரையும் பாதுகாக்க வேண்டும் என்றும் உங்களுக்கு நினைவுபடுத்துகின்றேன்.

இந்து சமுத்திரத்தில் எமது நாடு ஒரு சிறிய தீவாகும். நாம் உலக சக்திகளுடன் ஒவ்வொரு குழுவில் இணையவில்லை. எந்தவொரு குழுவுடனும் , உலக சக்திகளுடன் ஒப்பந்தங்களை செய்து கொள்ளப் போவதில்லை. உலகில் தனி நாடாகக் காணப்படுகின்றோம். எம்மைப் போன்று சிறிய தனித்துள்ள நாடுகள் பல உள்ளன. இவ்வாறிருக்கும் போது ஏனைய நாடுகளுடனான நட்புறவை பாதுகாக்கும் பொறுப்பு அரசாங்கத்திற்கு காணப்படுகிறது.

உங்களின் பொறுப்பு நாட்டை பாதுகாப்பதாகும். உள்ளக மற்றும் வெளிக்கள சவால்களுக்கும் முகங்கொடுக்க வேண்டும். ஐ.நா. இராணுவம் உள்ளிட்ட ஏனைய தரப்பினருடனும் இணைந்து சேவையாற்ற வேண்டியுள்ளது. நீங்கள் இணையும் இராணுவம் யுத்த அனுபவம் கொண்டதாகும். இரு தசாப்தங்களுக்கும் அதிக காலம் யுத்தத்தில் ஈடுபட்டு , ஒழுக்கமும் அனுபவமும் பெற்ற இராணுவமாகும்.

இன்று ஐ.நா.விற்காக மாலி நாட்டின் இராணுவத்துடன் இணைந்து சேவையாற்றும் இராணுவமாகும். இவ்வாறானதொரு இராணுவத்திலேயே நீங்கள் இணைகின்றீர்கள். இவ்வாறான இராணுவத்தில் தலைமைத்துவத்தை ஏற்பதற்கு நீங்கள் பலம் மிக்கவர்களாக இருக்க வேண்டும். பலமற்றவர்களாக இருந்தால் இராணுவத்துடன் இணைந்து செயற்படுவது கடினமாகும்.

எந்தவொரு சந்தர்ப்பத்திலும் சவால்கள் ஏற்படும் பட்சத்தில் அவற்றை ஏற்று புத்தி கூர்மையுடன் செயற்பட வேண்டும். அச்சமின்றி முன்னோக்கிச் செல்வதற்கான சக்தி காணப்பட வேண்டும். நாடு உங்களிடம் கொண்டுள்ள எதிர்பார்ப்பினை நிறைவேற்றுங்கள் என்றார்.Published from Blogger Prime Android App